నవంబరు - 2014 దినోత్సవాలు

నవంబరు - 11  ¤ జాతీయ విద్యాదినోత్సవాన్ని ఘనంగా నిర్వహించారు.       » భారత తొలి విద్యాశాఖమంత్రి మౌలానా అబుల్ కలాం ఆజాద్  జయంతిని పురస్కరించుకుని ఏటా ఈ దినోత్సవాన్ని నిర్వహిస్తారు.       » ఈ సందర్భంగా దిల్లీలో ఏర్పాటు చేసిన కార్యక్రమంలో రాష్ట్రపతి  ప్రణబ్ ముఖర్జీ పాల్గొన్నారు. నవంబరు - 13 ¤ గిన్నిస్ ప్రపంచ రికార్డుల దినోత్సవాన్ని ఘనంగా నిర్వహించారు   నవంబరు - 19  ¤ 'వరల్డ్ టాయిలెట్ డే'ను నిర్వహించారు.       » భారత్‌లో బహిరంగ మల విసర్జన చేస్తున్న వారి సంఖ్య ఏకంగా 59.7 కోట్లు  అని ఐక్యరాజ్య సమితి 'వరల్డ్ టాయిలెట్ డే' సందర్భంగా వెల్లడించింది.  ఈ విషయంలో భారత్ ప్రపంచంలోనే మొదటి స్థానంలో ఉన్నట్లు ఐరాస వెల్లడించింది.  భారత జనాభాలో 47 శాతం మంది ఆరు బయటే మల విసర్జన చేస్తున్నారని ఐరాస తెలిపింది.  నవంబరు - 25 ¤ స్త్రీలపై హింసకు వ్యతిరేకంగా అంతర్జాతీయ దినోత్సవాన్ని నిర్వహించారు.       » 1960 నవంబరు 25న డొమినికన్ రిపబ్లిక్‌లో రాజకీయ కార్యకర్తలైన  ముగ్గురు అక్కాచెల్లెళ్లను (మిరాబల్ సిస్టర్స్) దారుణంగా హత్య చేశారు. అందుకే  నవంబరు 25ను 'స్త్రీల పై హింసకు వ్యతిరేకంగా అంతర్జాతీయ దినం'గా  ఐక్యరాజ్యసమితి ఎంచుకుంది.       » యూఎన్‌వో 1999 నుంచి ఈ దినోత్సవాన్ని నిర్వహిస్తోంది. ప్రపంచ  వ్యాప్తంగా మహిళలు ఎదుర్కొంటున్న హింసపై వివిధ కోణాల్లో అధ్యయనాలు నిర్వహిస్తూ, నివేదికలు ప్రచురిస్తోంది. మార్పు కోసం ఏదిశగా కృషి సాగాలో సూచిస్తోంది. నవంబరు - 26 ¤ జాతీయ న్యాయ దినోత్సవాన్ని నిర్వహించారు.       » భారత ప్రజలందరికీ సామాజిక, రాజకీయ, ఆర్థిక న్యాయ కల్పనే రాజ్యాంగ  లక్ష్యం. అది సాకారమయ్యేందుకు సిద్ధం చేసిన రాజ్యాంగ తొలి ముసాయిదా ప్రతిపై  నవంబరు 26న సంతకాలు చేసిన రోజును 'జాతీయ న్యాయ  దినోత్సవం'గా నిర్వహిస్తున్నారు.       » చట్టం ముందు అంతా సమానమే అని, ఆ నిబంధనల ఆధారంగా  సత్వర న్యాయసాధనకు ముందుంటామని ఆ రోజున న్యాయవాదులు ప్రతిజ్ఞ  చేస్తారు. ¤ 2008 నవంబరు 26న ముంబయి ఉగ్రవాద దాడి ఘటన జరిగి  ఆరేళ్లు పూర్తయ్యాయి.       » 26/11 ముంబయి దాడుల మృతులకు ప్రధాని నరేంద్ర  మోదీ నివాళి అర్పించారు. 18వ సార్క్ సదస్సులో పాల్గొనేందుకు  ఖాట్మండులో ఉన్న ఆయన ట్విట్టర్‌లో తన సందేశాన్ని పెట్టారు.       » ఈ దాడులపై ఏర్పాటు చేసిన రామ్ ప్రధాన్ కమిటీ సిఫార్సులను  అమలు చేస్తామని మహారాష్ట్ర ప్రభుత్వం ప్రకటించింది.       » లష్కరే తోయిబాకు చెందిన పది మంది ఉగ్రవాదులు  2008లో ముంబయిలోని పలుచోట్ల జరిపిన దాడుల్లో 166 మంది  మరణించారు.